Pimmusay ti agarup 63 a tattao bayat a nadangran ti agarup 290 nga indibidual gapu iti napigsa a bagyo idiay Punjab province, Pakistan idi July 17, 2025.
Sigun iti National Disaster Management Authority, kaaduan kadagiti biktima ti nadunor gapu kadagiti narba a pasdek, nakuryente ken nalmes gapu iti layus.
Gapu iti dayta, naideklara ti public holiday iti siudad ti Rawalpindi nga asideg iti Islamabad Capital.
Nabilin metlaeng dagiti agnanaed iti asideg kadagiti karayan nga agbakwit.
Sigun kadagiti otoridad, nalayus dagiti dadduma a lugar kalpasan nga immadu ti danum kadagiti karayan.
Nangitunda daytoy iti pannakaiserra ti sumagmamano nga expressway iti intero a Punjab ken naitantan dagiti flights.
Agtultuloy paylaeng ti panangispal dagiti otoridad kadagiti nalayus a lugar.