Impakaammo ni Department of Labor and Employment-Cordillera Administrative Region (DOLE-CAR) Regional Director Imelda Romanillos kadua dagiti opisyales ti City Public Employment Service Office, SM Baguio, ken dadduma a partner agencies a maidiaya ti agarup 7,000 local ken overseas job vacancies iti Labor Day job fair ti siudad ti Baguio kas panangbigbig iti maika-124 a workers’ day inton bigat.
Maangay ti nasao a job fair iday Baguio Convention and Cultural Center ken idiay SM City Baguio.
Idauloan ti DOLE-Cordillera ti nasao a job fair no sadino manamnama ti agarup 50 employers a mangidiaya ti 4,415 local job vacancies ken 2,424 overseas employment opportunities.
Maibalbalakad met kadagiti job seekers nga isaganada ti adu a kopya dagiti resume dagitoy ken agsaganada para iti posible nga onsite interview.
Malaksid kadagiti job offers, maimatangan metlaeng ti presensya dagiti nagduduma nga ahensiya ti gobyerno tapno mangipaay ti impormasyon, konsultasyon, ken dadduma pay a serbisyo.
Agmonitor met ni Department of Migrant Workers kadagiti overseas employment ken mangiproseso kadagiti OFW documents partikular ti Overseas Employment Certificate.
Makipaset met ti Department of Trade and Industry tapno maasistaran dagiti entrepreneurs wenno start-up businesses kadagiti impormasyon ken singasing.
Mangidiaya pay ti serbisyo ti Technical Education and Skills Development Authority ken Professional Regulations Commission.
Nakasagana met a mangipaay ti assistance ti Home Development Mutual Fund wenno PAGIBIG, PhilHealth, ken Social Security System, Philippine Statistics Authority, Civil Service Commission, Employees Compensation Commission, Occupational Safety and Health Center, Bureau of Internal Revenue ken dadduma pay.
Ti nasao nga aktibidad ket maitunos iti tema para iti maika-124 a Philippine Labor Day nga “Disenteng Trabaho Para sa Lahat: Iisang Hangarin, Bagong Pilipinas, sama-samang Mararating’. //kcs
