TUBA, BENGUET- Narekober dagiti otoridad ti agarup innem a basyo ti bala iti asideg ti gasolinaan a napasamakan ti pammaltog ken hold-up sadiay camp 3, Tuba, Benguet idi Mayo 24, 2026.
Iti impormasyon a nakalap ti Bombo Radyo, narekober ti uppat a basyo ti bala a pakairamanan ti tallo a basyo ti 9mm pistol ken maysa a basyo manipud iti paltog a caliber 45.
Narekober dagiti basyo iti nagiparadaan dagiti dua a suspek iti inaramatda a motor.
Kabayatanna, dua pay a basyo ti bala ti narekober iti kalsada a paturong sadiay La Union nga asideg metlaeng iti natakawan a gasolinaan.
Malaksid iti daytoy, nasarakan pay dagiti otoridad ti maysa a motorsiklo, agarup 500 a metro ti kaadayona manipud iti gasolinahan.
Agtultuloy ita ti panagimbestigar dagiti otoridad no adda pakainaigan ti nasao a motorsiklo iti insidente.
Maipalagip nga iti inisial nga impormasion a nakalap ti Bombo Radyo Newsteam, mapatta-patta a dumanon iti nasurok P260,000 ti tinakaw dagiti suspek.
Sigun iti sumagmamano a residente, saan laeng daytoy ti umuna a gundaway a natakawan ti nasao a gasolinaan.
Nupay kasta, daytoy ti mapapati nga umuna a gundaway a napasamak ti pammaltog.
Iti agdama,agtultuloy latta ti imbestigasion dagiti otoridad iti napasamak nga insidente.//Bombo Noveh Organo
