BAGUIO CITY – Naan-anayen a naisardeng ti search and retrieval operation wenno panagbiruk iti bangkay ti maysa a mangngalap a naiyanod iti Malanas River sadiay San Juan, Abra, agarup makabulanen ti napalabas.
Sigun kenni Abra Provincial DRRM Officer Arnel Valdez, insardengdan ti panagbiruk iti bagi ni Jomar Guillermo Turqueza, 28-anyos, baro ken residente ti Abualan, San Juan, Abra.
Kinunana a daytoy ket gaputa dumanonen iti agarup makabulan ti panagsapsapulda iti bangkay ni Turqueza.
Maipalagip a malem idi Agosto 2 idi naiyanod ni Turqueza kabayatan ti panagballasiwna iti karayan kalpasan nga inguyod ti napegges nga ayos ti danum.
Dinakamat ni Valdz a sinawardan dagiti ig-igid dagiti karayan a posible a nakaisangladan ti bagi ni Turqueza ngem napaay dagiti rescue teams.
