BAGUIO CITY – Im-imbestigaran ita dagiti pulis ti pakabigbigan dagiti nangtakaw iti agarup P10-M a gatad dagiti alahas ken nasurok P45,000 a cash manipud iti maysa a shop sadiay Mines View, Baguio City idi kalman.
Nabigbig met ti agtagikula iti nasao a shop a ni Precy Marcelo, 66-anyos, naasawaan, negosyante, tubo ti Santiago, Isabela ken residente ti Leonard Wood Road, Baguio City.
Maibasar iti report ti pulisya, simrek dagiti suspek iti nasao a shop babaen iti barangay manhole a masarakan iti agarop 240 meters manipud iti stall ti biktima.
Nagaramat dagiti suspek iti hydraulic jack tapnu maiduron ti kongkoreto a datar ken ti nasao metlaeng nga abot ti nagserbi nga exit point dagitoy kalpasan a tinakawda dagiti nasao nga alahas ken cash.
Nadiskobre ti pulisya iti nasao a disso ti hydraulic jack ken dadduma pay nga arwaten dagiti suspek.
