BAGUIO CITY – Mapattapatta a dumanon iti agarop P2.3 million ti gatad dagiti 10 a babbalay a nauram sadiay Cresencia Village, siudad ti Baguio idi kalman ti parbangon.
Sigun kenni Fire Chief Inpector Nestor Gorio, dadaulo ti Bureau of Fire Protection – Baguio, agtultuloy pay laeng ti panangimbestigarda iti insidente tapnu mapaneknekan no anya ti kangrunaan a rason iti napasamak nga uram.
Kinunana nga iti inisyal nga imbestigasionda ket posible a nagtaud ti uram iti nabaybay-an a kandela ken posible met nga intunda daytoy ti panakapukaw iti suplay ti kuryente.
Inaklonna a nabayag ti panagresponde ti BFP iti nasao nga insidente ti uram gapu kadagiti ado a nakabangen iti kalkalsada iti nasao a barangay.
Naamuan mut a duapulo ket dua a pamilya wenno 108 nga indibidual ti naapektaran iti panakauram dagiti sangapulo a babbalay.
