Kinumpiska dagiti kameng ti Itogon Municipal Police Station ti agarup 39 a napukan a pine lumber ken tallo pay a piraso ti kayo, babaen iti naisayangkat nga anti-illegal logging operation idiay Sitio Muyot, Brgy. Gumatdang, Itogon, Benguet ita nga aldaw, Setyembre 14.
Dagiti nakumpiska a napukan a kayo ket addaan iti estimated value a dumanon iti P24,811.28.
Sigun iti pablaak ti Itogon PIO, naipatungpal ti nasao nga operasyon pasado alas-dos ti malem iti nasao a barangay no sadino nagresulta daytoy iti pannakakemmeg ti maysa a lalaki nga agtawen iti 49 ken pannakakumpiska dagiti napukan a kayo ken chainsaw nga inaramat daytoy.
Sigun iti report, natiliwan ti suspek nga agragragadi kadagiti kayo nga awanan iti umno a permit, lisensya wenno anyaman a supporting document manipud iti Department of Environment and Natural Resources (DENR).
Dagos met a naiyuman ti nasao nga issue iti Municipal Environment and Natural Resources Office (MENRO) ti nasao a munisipyo ken iti Community Environment and Natural Resources Office (CENRO).
Kalpasan iti scaling ken assement nga insayangkat dagiti nadakamat nga ahensya, naiturong metten dagiti kayo iti Community Environment and Natural Resources Office (CENRO) bayat a ti suspek ket naiturong iti kustodiya ti Itogon MPS para iti umno a dokumentasyon.
Maisagsagana metten dagiti dokumento para iti inquest proceeding ti kaso.
Sumango ti suspek iti pananglabsing iti Presidential Decree No. 705 wenno ti Revised Forestry Code of the Philippines ken Republic Act No. 9175 wenno ti Chainsaw Act of 2002.
