BAGUIO CITY – Natiliw ti maysa a barito kalpasan a nakumpiskar kenkuana ti dumanon P4.4-M a gatad dagiti marijuana bricks sadiay Bagumbayan, Tabuk City, Kalinga idi kalman.
Maibasar iti report ti pulisya, manarimaan ti panagdalyasat ti lugan ti Tabuk City Police Station iti Sitio Banat, Barangay Bagumbayan sadiay Tabuk City idi nag-overtake kadakuada ti maysa a motorsiklo nga awanan ti plaka.
Nupay kasta, killaat a natumba ti motorsiklo iti igid ti kalsada isut gapuna a dagus met a tinulongan dagiti pulis ti kakaisuna a rider ti motorsiklo.
Kabayatan ti panangtulongda iti rider ket nakitada ti nakalukat bassit a backpack ti rider ken ti linaon daytoy a maatap a marijuana bricks.
Gapu iti daytoy, sinukimatda ti bag ken sadiay a nakitada ti kontrabando a bukbuklen ti 35 a pidaso ti marijuana bricks nga agdagsen ti 36.602 kilos.
Nagresulta daytoy iti panangkemmegda iti barito a naduktalan a residente ti Tinglayan, Kalinga.
Sigun kenni PCol. Davy Vicente Limmong, provincial director ti Kalinga Police Provincial Office, ar-aramaten ita dagiti drug traffickers dagiti menor de edad kas drug couriers iti pammatida a nakatutuk laeng ti pulisya iti agdama a pandemya.
Nupay kasta, impettengna a saan a sumarsardeng dagiti otoridad iti panangparmekda iti iligal a droga.
