BAGUIO CITY – Dumanon iti nasurok kumurang kagudua a milyon a pisos nga addaan iti nagduduma a denominasyon ti intaray dagiti agtatakaw manipud iti aggasawa a negosyante sadiay Appas Sur, Tabuk City, Kalinga idi rabii.
Nabigbig dagiti biktima a da Ben Oliver, 42, ken ni Erlinda Oliver, 39, agpada a residente iti nasao a lugar.
Maibasar iti inisyal nga imbestigasyon, pagsangpet dagiti biktima iti balayda ket nagturong ni Mrs. Oliver iti kusina, sinurot daytoy dagiti saan pay a nabigbig a suspek ken maysa kadagitoy ti nangtutok kenkauna iti paltog.
Inala ti maysa a suspek ti bag ti biktima a naglaon iti cash, lima a passbook ken dadduma pay a napapateg nga IDs.
Saan pay a napnek dagiti suspek ket pinang-orda ti ulo ni Mr. Oliver sakbay a sinerrekda ti dadduma a kwarta ti balay.
Segun kenni Mr. Oliver, uppat dagiti armado a suspek a nakasuot ti bull cap ken face mask, tallo kadagitoy ti nakaiggem iti short firearm bayat a maysa ti nakaiggem iti rifle.
Naamoan nga adda ti CCTV camera iti balay dagiti biktima ngem dinadael dagiti suspek ti amin a monitor ken inalada dagiti memory cards sakbayda a naglibas.
Nakaala met ti SOCO iti dua a latent prints para iti posible a panakabigbig dagiti suspek.
