Nakumpiskar dagiti otoridad ti mapatta-patta a ₱63,444.00 a gatad ti shabu iti maysa a regional watchlisted drug personality kagidan iti panangipatungpalda iti search warrant iti maysa a lugan idiay Sitio Masablang, Barangay Bantay, Paracelis, Mountain Province, itay kanikadua.
Malaksid iti ilegal a druga, naala metlaeng dagiti otoridad manipud iti suspek ti maysa nga paltog nga awan lisensyana.
Sigun kenni Director III Edgar T. Jubay, nabigbig ti suspek kas maysa a lalaki nga agtawen iti 33, ken residente ti Sitio Masablang.
Inisyal a puntirya ti search warrant ti lugan. Nupay kasta, kabayatan iti search operation iti nasao a lugan, nakumpiskar dagiti otoridad ti innem a plastic sachets a naglaon iti maatap a shabu nga addaan iti kadagsen a 9.33 grams.
Malaksid iti dayta, nakumpiska metlaeng ti sumagmamano a drug paraphernalia, .45 caliber a paltog, ken bala a naidulin iti uneg ti lugan.
Balligi ti naipatungpal nga operasyon babaen iti panangidaulo ti PDEA Mountain Province Provincial Office, ken iti koordinasyonda iti Mountain Province Police Provincial Office (Provincial Intelligence Unit / Provincial Drug Enforcement Unit), Paracelis Municipal Police Station, ken 1st Platoon, 2nd Mountain Province Mobile Force Company.
Maisagsagana metten ti kaso a pananglabsing iti Republic Act 9165 (Comprehensive Dangerous Drugs Act of 2002) ken Republic Act 10591 (Comprehensive Firearms and Ammunition Regulation Act) kontra iti suspek.
