Pimmusay ti sangapulo ket tallo nga indibidual bayat a nadangran ti kaaduan a dadduma pay gapu iti panag-atake ti Israel iti tallo a balay iti abagatan a siudad ti Gaza idiay Rafah.
Daytoy ket sigun kadagiti opisial a kameng ti medikal sadiay.
Idiay Gaza City nangruna iti amianan a paset ti lugar, dua a balay ti nadadael a nakaitundaan ti pannakatay ken pannakadunor kasta met ti pannakadangran dagiti sumagmamano a tattao.
Ti gubat ket nangrugi babaen ti panangraut dagiti militante a grupo ti Hamas idiay Israel idi Oktubre a siete a nakatayan ti 1,200 nga indibidual ken pannakaibalud ti 253 nga indibidual kas maibasar iti datos ti Israel.
Maipalagip nga inkari ti Israel a pukawenda ti Hamas, a mangkonkontrol ti Gaza, babaen ti operasion militar a nakatayan ti nasurok 34,000 Palestinians.
Iti agdama, dumanon iti 2.3 milyon a populasion ti napaikkat iti nasao a lugar.
Idi laeng kalman (Abril 28), kinuna ni Khalil Al-Hayya, deputy Gaza chief ti grupo a manamnama a mapagtalantanan ti singasing a ceasefire wenno panagsdardeng ti gubat.
Sigun met iti maysa a mangibabaet a supsuportaran ti Estados Unidos, pinapigsada ti panagregget a mangileppas ti maysa a katulagan gaputa nagpangta manen ti Israel a rautenda ti Rafah.
Dua kadagiti Hamas officials ti saan a nangipalgak kadagiti detalye dagiti singasing a panagsardeng ti gubat ngem manamnama a sumungbat ti Hamas iti kaudian a singasing ti panagsardeng ti gubat ti Israel a naipaay ita laeng kanikadua.
