Imbutaktak ni sigud a senator Antonio Trillanes iti press conference na idi kalman a maatap a naipaay ti agarup P469 milyon kadagiti entity a maikonkoneta ita kenni Vice President Sara Duterte ken iti asawa na a ni Atty. Manases Carpio.
Sigun iti sigud a senador,ti nasao a gatad ket maatap a manipud iti gobyerno ti China wenno nagduduma a China-based corporation.
Sigun kenni Trillanes, P150 milyon ti maatap nga inawat ti Tapang at Malasakit Alliance for the Philippines, maysa a foundation nga impatakder ni VP Sara.
Sigun iti dokumento nga impresenta ni Trillanes, ti nasao a kuwarta ket nagtaud iti Embassy of the People’s Republic of China ken naituding para iti pannakapatakder ti 13 a classroom buildings idiay Davao City, iti sidung ti katulagan nga naipatungpal kadua ti Chinese Embassy.
Kabayatanna, impeksa pay ti sigud a senador nga agarup P319 milyon met ti naawat ti Cale88 Foods Corporation maysa a kompanya a sigun kenni Trillanes, ket kukua ni Mans Carpio.
Para iti sigud a senador, saan daytoy a maipanggep iti kuwarta laeng nu di ket maipanggep metlaeng iti national security gapu ta adda ti kaipapananna daytoy kadagiti entity a konektado iti agdama a bise presidente.
Kabayatanna, nainget met a pinaglibakan ti kampo ni VP Sara Duterte dagiti nasao nga alegasyon ken inawaganna a “malicious fabrications” dagiti impresenta ni Trillanes kontra kenni VP Sara ken iti asawa na.
