Nakasagana ti Land Transportation Franchising and Regulatory Board (LTFRB) iti agbalin nga epekto iti ikasa a transport strike iti Pagkakaisa ng mga Samahan ng Tsuper at Operator Nationwide (Piston) inton Huebes, September 18.
Iti impablaak iti nasao nga ahensya iti opisyal a social media page dagitoy, impakaammoda a nakasagana dagitoy nga i-mitigate wenno kissayan ti panakataktak a mabalin nga itunda ti transport strike kadagiti riding public wenno komyuter.
Impanamnama daytoy a nakaisaganadan kadagiti contingency measures tapno saan a mataktak ti publiko.
Babaen metlaeng daytoy iti panakitinnulongda iti Department of Transportation (DOTr), Metropolitan Manila Development Authority (MMDA) ken kadagiti amin a maseknan a local government units (LGUs).
Kagiddan dayta, kiniddaw ni LTFRB chairperson Teofilo Guadiz III iti publiko nga agtalinaed dagitoy a kalmado gapu ta adda dagiti alternatibo a ruta ken kanayonan a lugan nga ipaay dagitoy tapno mapalag-an bassit ti epekto ti nasao a tignay-protesta.
Karaman kadagiti transport units nga ideploy ti nasao nga ahensya kas kanayonan a pagluganan ket ti military trucks, buses ken dagiti modernized public utility vehicles (PUVs).
Kabayatanna, kinuna ni Guadiz a minimal laeng ti agbalin nga epekto ti transport strike kadagiti komyuter gapu metlaeng iti kooperasyon dagiti daduma a drivers ken operators a saan a makipaset iti transport strike.
