Ngimmato ita ti presyo dagiti nateng iti Block 4 iti Baguio City Public Market nangruna dagiti bulbulong.
Daytoy ket gapu iti panagdalapos ni Bagyong Kristine a nakaitunda iti panakaitantan ti delivery manipod kadagiti mannalon wenno prodyuser.
Maibasar iti kaudian a presyo dagiti lowland vegetables idiay Block 4 Baguio City Public Market, ngimmato iti Php5 agingga Php20 tunggal reppet wenno kilo dagitoy kas iti bunga ti parya nga iti agdama ket magatangen iti Php80 tunggal kilo manipod iti sigud a presyo daytoy a Php60 tunggal kilo,ti Okra a Php60 tunggal reppet manipod iti Php40, ken Kamote Tops a nagbalin a Php20 tunggal reppet manipod Php10.
Karaman pay kadagiti nateng a ngimmato ti presyona ti tabungaw, tarong, saluyot, sitaw, pallang,sabunganay, ken kabatiti.
Agtaltalinaed met iti sigud a presyo ti bulong ti parya, ken karabasa, bayat a bimmaba ti presyo ti sili gapu iti oversupply.
Kapada metlaeng a sitwasyon ti mapaspasamak kadagiti highland vegetables kas iti patatas, bell pepper, repolyo, ken sayote.
Agparparang a maysa kadagiti rason iti panagngato ti presyo dagiti nadakamat a produkto ti ngimmato metlaeng a transport fee.
Mainaig iti dayta, posible pay ti panagngato ti presyo dagitoy kadagiti sumarsaruno nga aldaw.
Maipalagip a sumagmamano kadagiti kalsada iti Probinsya iti Benguet ken iti Baguio City ti temporaryo a naiparekep gapu kadagiti insidente iti panagreggaa-ay iti daga ken bato.//Bombo Jez Lapizar
