Inwaragawag ti Commission on Audit (COA) nga agarup P2.83 bilion iti badyet ti gobierno iti 2023 Health Facilities Enhancement Program (HFEP) ket naitantan wenno nabaybay-an a saan a naipatungpal.
Iti tinawen nga audit report iti Department of Health para iti 2023, kinuna dagiti state auditors nga iti P2.8 bilion, aggatad ti P2.44 bilion ti naitantan wenno saan a naimplementar.
Ti pannakitantan dagiti Health Facilities Enhancement Program infrastructure projects ket masarakan sadiay Region 6 wenno Western Visayas nga addaan ti dua a proyekto, Region 9 wenno Zamboanga Peninsula nga addaan ti maysa a proyekto, Region 11 wenno Davao Region nga addaan ti dua a proyekto ken Region 12 wenno Soccsksargen nga addaan ti tallo a proyekto.
Malaksid iti dayta, adda pay ti saan a naaramat a pondo para iti infrastructure projects ti Regions 9, 11, ken 12 nga aggatad ti P83.78 milion.
Maysa a kangrunaan a saan pay a naipatungpal a proyekto ke ti Western Visayas Center for Health Development, a napondoan ti P306.54 milion.
Ti kapatgan a non-utilized HFEP project funding ket ti P1.074 billion a proyekto ti Southern Philippines Medical Center (SPMC) iti Siudad ti Davao.
Kabayatanna, sigun iti COA, dagiti sumagmamano a rason ti pannakaitantan, saan a pannakaaramat ti pondo ken saan a pannakaimplementar ket gapu iti temporario a pannaksuspindi ti trabaho, pannakaitantan ti bayat para iti delivery fees,pannakabaybay-an dagiti saan pay nalpas a trabaho dagiti kontraktor, ken dadduma pay a rason.
