BAGUIO CITY- Pimmusay ti agina bayat a nadangran ti dua a kadwa dagitoy iti aksidente sadiay Barangay Bulo, Tabuk City, Kalinga.
Nabigbig dagiti pimmusay nga agina a da Claire Daluping, 39-anyos ken ti anakna ni Kawih Daluping, 6-months old bayat a dagiti nadangran ket da Kristell Dumalsin Gasatan, 15-anyos ken ni Beverly Daluping, 14-anyos; bin-ig a residente ti Sitio Dananao, Barangay Lacnog, Tabuk City, Kalinga.
Maibasar iti imbestigasyon, nagtaud ti maysa nga gray Mitsubishi Montero Sport Vehicle nga addaan plate number CAC 2356 manipud Isabela ken paturong daytoy sadiay Barangay Bulo, Tabuk City, Kalinga.
Inmaheno daytoy ni Edwin Rielo Ortiz, 64-anyos, retired Philippine Army member a residente ti Magsaysay, Tabuk City Kalinga kadwana ti pasaherona a ni Daisy Quezon, 49-anyos a residente ti Ipil, Tabuk City, Kalinga.
Kabayatan ti panagturong ti nasao a lugan sadiay Kalinga ket nag-overtake ni Ortiz ngem napukawan iti kontrol rason a nadungparna ti maysa nga store a nagtugawan dagiti biktima.
Naitaray da Claire Daluping; Kawih Daluping, Kristell Dumalsin Gasatan, ken ni Beverly Daluping iti nagsina nga ospital.
Nupay kasta, indeklara dagiti attending physician a dead on arrival da Claire ken ni Kawih bayat nga stable met ti kondisyon da Kristell ken ni Beverly.
Naka-detain met ita ti driver ti Mitsubishi a ni Edwin Rielo Ortiz iti Tabuk City Police Station ken maisagsaganan ti kaso a Multiple Homicide, Serious Physical Injuries and Damage to Properties kontra kenkuana.
