Nakemmeg dagiti live-in partner a residente iti Windy Hill, Buyagan, La Trinidad, Benguet iti naipatungpal a buy-bust operation idiay Sitio Minoc, Tuding, Itogon, Benguet itay laeng nabiit.
Nakumpiskar kadakuada ti duapulo ket walo(28) a pakete ti maatap a shabu malaksid pay iti maysa a pakete nga inaramatda para iti poser buyer.
Addaan daytoy iti pakabuklan a dagsen a 46.31grams ken Standard Drug Price a nasurok Php300,000.
Iti panangimatang ti Bombo Radyo iti nasao nga operasyon, ti babae a suspect ti mangilaklako iti maysa nga heat sealed transparent plastic sachet a naglaon ti white crystalline substance a maatap a shabu nga agdagsen ti .62 grams ken aggatad ti P4, 216.
Malaksid iti dayta, nadiskubre metlaeng dagiti otoridad ti kanayunan pay a walo a pakete iti nasao nga iligal a droga manipod kenkuana.
Kagiddan dayta, dua pulo a pakete met iti kapada a produkto ti nakumpiskar manipod iti live-in partnern daytoy.
Kabayatanna, dagiti met non-drug evidence a nakumpiskar ket pakairamanan iti maysa a piraso ti genuine P1000, maysa a piraso ti P1000 buybust money, maysa a kotse, dua a cellphone, IDs, bags, pouches, kuarta nga aggatad iti P33, 140, ken dadduma pay.
Iti agdama, naiturungen dagiti suspects iti Itogon Municipal Police Station para iti dokumentasyon ken umno a disposisyon dagitoy.
Ti opersyon ket naballigi babaen iti nagtitipon a pwersa iti Provincial Drug Enforcement Unit-Benguet, Itogon Municipal Police Station, Philippine Drug Enforcement Agency-Benguet, ken dadduma pay a maseknan nga opisina.//Bombo Jez Lapizar
