BAGUIO CITY – Nakemmeg ti aglola gapu iti panagimula dagitoy iti marijuana sadiay Calaba, Bangued, Abra.
Nabigbig ti apo a ni Bryan Bayle Banzon alyas Bayan, 27-anyos bayat a ti lolana ket ni Rosalina Brazil Bayle alyas Saling, 67-anyos, agpada a residente ti Calaba, Bangued, Abra.
Sigun iti pulisya, nakaawatda iti impormasyon mainaig iti panagimula ti marijuana iti nasao a lugar ken iti panagresponde dagitoy ket nadanunanda ti panagbilbilang ti nasao a lola iti maatap a bulong ti marijuana iti rooftop ti balay dagitoy.
Ginandat pay ti nasao a lola a tinmaray ngem nakemmeg latta daytoy ken nakumpiskar iti ima ti lola dagiti ikotna a drug paraphernalia a ginandatna pay nga ipurwak iti ruwar ti balayda.
Narekober dagiti impurwak ti baket a drug paraphernalia a bukbuklen ti maysa a bundle ti aluminum strips, maysa nga improvised aluminum foil pipe, 11 a piraso ti pakete a naglaon ti maatap a shabu residue ken dua a piraso ti lighter.
Nakumpiskar pay iti operasyon ti maysa a fully-grown marijuana a naimula iti masitera.
Iti agdama, sumangsangon ti ag-lola iti Comprehensive Dangerous Drugs Act of 2002.
