BAGUIO CITY – Maad-adal ita iti Committee on Laws ti singasing nga ordinansa a mangpabalin a maymaysa wenno agpapada ti panagrikep dagiti amin a balay-paginuman iti siudad ti Baguio nga addaan operasyon iti rabii.
Panggep pay ti singasing nga ordinansa a pinutar da Councilors Leandro Yangot Jr. ken Elmer Datuin nga amyendaran ti City Ordinance No. 88, series of 2009.
Nailanad iti singasing a maipalubos ti operasyon dagiti amin a balay paginuman nga addaan operasyon iti rabii iti agingga alas dos ti parbangon ken ti nasao nga oras ti agpapada a closing time dagitoy.
Dinakamat ti singasing nga ordinansa a karaman dagiti balay paginuman kadagiti paga-ayat a turturongen dagiti sangaili nga agturturong ditoy siudad.
Nailawlawag pay a nasken a maikonsidera ti singasing dagiti agtagikua kadagiti inoman a panakarebisar ken panakarepaso ti agdama nga ordinansa seknan iti panagrikep dagitoy tapnu saanda unay a malugi ken saan a mariro dagiti kustomer dagitoy.
Maipalagip nga iti agdama a Liqour Ordinance ti siudad ket nagduduma ti naituding a panagrikep dagiti balay paginuman iti rabii depende iti klasipikasyon dagitoy.
