Ay-aywanan ita ti Department of Environment and Natural Resources ti maysa a kritikal ken maikonsidera nga endangered freshwater turtle kalpasan a naisalakan daytoy idiay Barangay Capanikkian, Calanasan, Apayao.
Ti ayup ket nabigbig kas Cantor’s giant softshell turtle, nga agdagsen iti agarup sangapulo a kilo ken dumanon iti 47 a sentimetro ti kaatidogna.
Sigun iti DENR-CENRO Calanasan, umuna a gundaway a nailista ti nasao nga species iti Apayao River kalpasan nga aksidente a natiliw iti maysa a mangngalap a kusa a nangipaay iti turtle kadagiti otoridad.
Iti panagsukimat dagiti beterinario, naamuan nga adda ti itlog ti pagong, maysa a senyales nga agtultuloy pay nga agpapaadu ti species iti nasao a river system.
Maibilbilang nga endangered species ti Cantor’s giant softshell turtle gapu iti agtultuloy a panagbaba iti populsion daytoy, sigun iti International Union for Conservation of Nature.
Sigun pay iti DENR, ipakpakita iti presensia iti species a napateg ti biodiversity ken ecosystem idiay Apayao, a mabigbigbig kas maysa a biosphere reserve.
