BAGUIO CITY – Mailukat ti agri-tourism ti La Trinidad, Benguet para kadagiti local tourist wenno dagiti umili ti munisipyo.
Iti interview ti Bombo Radyo Baguio kenni Mayor Romeo Salda, kinunana nga inrekomendar daytoy ti Project Monitoring Committee ken inaprobaran ti lokal a gobyerno ken dagiti amin a barangay ti munisipyo.
Kinunana a 10 a parke, pakairamanan dagiti nagduduma nga eco-farm sadiay La Trinidad ti nailukat kadagiti umili partikular ti Mt. Kalugong, Mt. Costa, Avong ni Romy ken dagiti pagmulaan sadiay Alno.
Linawlawaganna a para laeng kadagiti residente ti La Trinidad ti panakailukat dagiti nasao a pagpasayaran ken nasken a suruten dagitoy ti market schedule a naituding tunggal barangay.
Innayonna a 10 laeng a miembro ti pamilya ti kangatuan a bilang dagiti mabalin nga agpasyar ken nasken nga agala dagitoy iti maysa a tourist guide.
Kagiddan iti daytoy ket ipalpalagip ni Mayor Salda ti panangipatungpal dagiti agro-tourism sites iti nainget a safety protocols kas iti panaglista iti logbook ken panagala iti temperatura dagiti agpasyar.
Namnamaen pay ti mayor a saan nga agbalin a rason ti panakailukat dagiti agro-tourism sites iti panagngato ti kaso ti COVID-19 sadiay.
