Impeksa ni Buguias Mayor Ruben Tinda-an a ti agrikultura ti kangrunaan a rason nu apay a nagbalin a 1st class municipality ti Buguias.
Ti ngamin sigud a classification ti nasao a munisipyo ket third-class municipality ngem ngimmato ti classification daytoy kas first-class municipality.
Kinuna ni Mayor Tinda-an a ti munisipyo ti Buguias ti kangrunaan a mangpatpataud (produce) iti nateng iti probinsiya ti Benguet.
Innayonna pay a ngimmato metlaeng ti income dagitoy ken naartapanda (exceeded) ti P200 million nga annual average income.
Gapu iti dimmur-as nga ekonomiya ti Buguias, kiniddaw manen ni Mayor Tinda-an ti agtultuloy a tulong dagiti umili tapnu agtultuloy ti panagprogreso ti ilida.
Kabayatanna, imbinglay pay ti Mayor a nakaawat ti Buguias iti award a Seal of Good Local Governance idiay Manila itay laeng nabiit ken nakaawatda pay iti P1 million a reward.
