BAGUIO CITY – Naipilaan iti kaso a panagtakaw ken panagdangran ti maysa nga agtagibalay kalpasan nga inalana ti cellphone ti maysa a lalaki iti uneg ti maysa a balay-paginuman sadiay Legarda Road, siudad ti Baguio.
Nabigbig daytoy a ni Melanie Leon, 30-anyos ken residente ti Cypress, Irisan, Baguio City bayat a nabigbig ti biktimana a ni Joel Lauyan, 24-anyos, awanan ti trabaho ken residente ti Itogon, Benguet.
Maibasar iti report, nagturong ti biktima ken dagiti kaduana iti nasao balay paginuman ken kabayatan ti panag-inomda ket napan nagsala dagiti kakadua ti biktima.
Nupay kasta, kalpasan ti panagsala ket nagreklamo ti maysa kadagiti kadua ti biktima gaputa mapukpukawen ti cellophone daytoy.
Dagusda nga inyuman ti pakaseknan iti management ti balay-opaginuman ngem saanda a nasarakan ti cellphone isut gapuna nga intuloyda manen ti nag-inom ti arak.
Iti panagturong ti biktima iti dance floor ket nakita ti kaduana ti panangsurot ti suspek iti daytoy.
Dagus a simmurot ti nasao a kadua ti biktima ken sadiay nga ingemanna ti suspek ken iti panangrikisada iti suspek ket narekober manipud iti suspek ti mapukpukaw a cellphone.
Kabayatan met ti panagsaritada dagitoy ket killaat a dinanog ti suspek ti complainant.
