BAGUIO CITY – Pinaglibakan ni Baguio City Health Services Officer Dr. Rowena Galpo ti agwarwaras a damag iti lokalidad nga addan ti kaso ti coronavirus illness gapu iti tallo nga estudyante a nagtaud sadiay China.
Iti interview ti Bombo Radyo, kinunana nga awan ti rason tapnu agdanag, maalarma ken ag-panic ti publiko gaputa saan a pudno ti damag a na-confine iti ospital ditoy siudad dagiti nasao nga estudyante gapu iti coronavirus illness.
Inlawlawagna a nagpakonsulta laeng dagiti tallo a gangannaet kalpasan a narigatan dagitoy a naganges.
Impettengna nga iti konsultasyon ket awan ti nakita kadagiti tallo iti aniaman kadagiti sintomas ti coronavirus infection.
Innayonna a naipaayan met iti umno a treatment dagiti tallo sakbay dagitoy a napa-awid.
Nupay kasta, impasigurado ni Dr. Galpo a nainget a mabantayan dagiti tallo a gangannaet nga estudyante babaen kadagiti medical personnel ti La Trinidad, Benguet nga addaan sakop iti dormitoryo dagiti tallo.
Sigun kenkuana, mabantayan dagiti tallo iti uneg ti 21 nga aldaw tapnu mamonitor no adda ti development wenno no adda ti makita a sintomas ti impeksion ti coronavirus kadagitoy para iti napartak ken maiyannatop nga aksiyon.
Immapela pay ni Dr. Galpo kadagiti miyembro ti Filipino-Chinese Community ditoy Baguio City ken Benguet tapnu tumulongda iti panakamonitor dagiti kakadwada, partikular dagiti nagbiahe saiday China nangruna dagiti nagturong iti Wuhan City iti napalabas a 10-14 nga aldaw tapnu dagusda nga ireport kadagiti maseknan.
Nupay kasta, imbalakadna ti panagridam ti publiko manipud iti 2019-nCov iti baet nga awan pay ti nakumpirmar a kaso ti nasao a virus ditoy pagilian.
