Inlawlawag ti Department of Social Welfare and Development (DSWD) a saan a naimpluensiaan iti politika dagiti programa ti Ayuda sa Kapos ang Kita (Akap) ken Assistance to Individuals in Crisis Situations (AICS).
Daytoy ti kinuna ni DSWD Crisis Intervention Unit (CIU) Director Edwin Morata iti maysa forum kas sungbat iti saludsod maipapan kadagiti kritisismo dagiti programa ti social welfare bayat ti 2025 midterm elections.
Sigun kenni Morata, saan laeng nga eksklusibo para kadagiti napanglaw ti Assistance to Individuals in Crisis Situations nu diket para metlaeng iti amin a low wenno high income, nabaknang wenno saan, propesional wenno saan ken empleyado wenno saan.
Innayonna a ti programa ket saan laeng a mangipaay iti cash relief no diket tulong para kadagiti medikal a kasapulan, funeral, education, transportation, material a kasapulan, taraon ken psychosocial support.
Karaman kadagiti kritiko dagiti programa ti Department of Social Welfare and Development kabayatan ti kampania ti eleksion idi 2025 ket dagiti kandidato a senador ti Partido Demokratiko Pilipino (PDP), nu sadinno inawaganda kas “short-term dole-outs” nga araramaten dagiti abusado nga adda iti turay.
