BAGUIO CITY – Agingga ita ket awan ti aksion ti National Commission on Indigenous Peoples (NCIP) – Cordillera iti isyu a sangsangwen ti nabotosan nga IP Mandatory Representative ti siudad ti Baguio ken dagiti nangpetisyon iti panagtugaw daytoy.
Sigun kenni Atty. Jingboy Atonen, abogado dagiti nagpetisyon kontra kenni Sinot, in-refer ti piskal ti nasao a kaso para iti ‘mediation’.
Kinunana nga awan met ti napasamak a settlement iti nagbaetan ti dua a benneg.
Innayonna a nagnumuan ti dua a benneg a no awan ti settlement ket mabalin a maipaima ti kaso iti NCIP, partikular iti regional director ti ahensia.
Panggep ti katulagan a ti NCIP-Cordillera ti mangtungtung iti dua a partido.
Nupay kasta, kinunana nga agingga ita ket awan ti aksion ti nasao nga ahensia.
Maipalagip a nangipila iti petisyon ti maysa a grupo dagiti IPs iti siudad tapnu malapdan ti panagtugaw ni Sinot kas IPMR ti Baguio a pinatgan met ti korte babaen iti panangipaulog daytoy iti preliminary injunction.
Patien dagiti petitioners nga adu dagiti anomalya a napasamak iti panakapili ni Sinot ken saan pay daytoy a kwalipikado nga agbalin nga IPMR ti Baguio City.
