Nakasaganan dagiti nagduduma nga aktibidad para iti makabulan nga Indigenous Peoples wenno IP Celebration iti Rehiyon Cordillera.
Sigun kenni Atty. Atanacio Addog, Regional Director iti National Commission on Indigenous Peoples-Cordillera Administrative Region, karaman iti panangselebrar iti IP Month ti Indigenous Peoples Mandatory Representative (IPMR) Summit a maisayangkat inton Oktobre 26, bayat a maipatungpal met ti culminating activity inton Oktobre 27.
Agserbi met kas host ti probinsya ti Benguet babaen metlaeng iti inisyatibo ni Provincial IPMR Benjamin Palbosa.
Inlawlawag met ni Atty. Addog a saan laeng a nakapokus ti selebrasyon iti dua nga aktibidad gapu ta adda pay dagiti naisagana a nagduduma a programa ken adbokasia tapno adadda a mapabileg ti pannakabigbig, pannakaitandudo, ken panangsalwas kadagiti karbengan ken kultura dagiti Indigenous Peoples iti rehiyon.
Karaman kadagiti aktibidad ti panangiparangarang kadagiti kultura, tradisyon, ken practices dagiti IP communites iti Rehiyon Cordillera, kas paset iti panangitag-ay iti kinasiasino ken panagkaykaysa dagiti IPs.
Impanamnama met ti Regional Director Addog ti panagsisinnukat dagiti nagduduma a probinsya kas host iti nasao a selebrasyon tapno maikan-gundaway ti tunggal probinsya a maipakita dagiti bukodda a kultura, tradisyon, ken nagduduma nga aktibidad dagiti Indigenous People iti lugar da.
Innayonna a babaen iti panagsisinnukat dagiti probinsya nga ag-host, saan laeng a maymaysa a probinsya ti mapagbalin a sentro ti selebrasyon nu di ket maipakita metlaeng ti nagdumaan dagiti IP Communities iti entiro a Cordillera.
Imbinglay metlaeng ni Atty. Addog a nakaplano metten ti meeting a mapagtatalantanan iti IPMR Summit inton Octobre 26, no sadinno karaman ditoy ti maipanggep iti sumaruno a probinsya nga agserbi kas host iti nasao a selebrasyon.
Maysa met daytoy a wagas tapno agtultuloy ti pannakitrabaho dagiti IPMR iti rehiyon ken mapapigsa ti koordinasyon dagiti probinsya iti panangipatungpal kadagiti programa ken adbokasia para kadagiti IPs.
Mainaig iti dayta . .
Impeksa ni Atty. Atanacio Addog, Regional Director iti National Commission on Indigenous Peoples-Cordillera Administrative Region a no maipapan iti pannakapabileg, nasaysayaat ti pannakipaset dagiti Indigenous People iti Cordillera nu idilig iti dadduma a rehiyon.
Agtultuloy met dagiti adbokasiya ti ahensya iti panangpapigsa iti pannakapabileg dagiti IPs babaen kadagiti programa ken aktibidad a mangipaay iti oportunidad para kadagiti Indigenous People, pakairamanan dagiti training, IP Youth Programs, ken IP Women Forum.
Sigun kenni Atty. Addog, napateg ti pannakipaset dagiti agtutubo ken babbai kas aktibo a paset dagiti IP Communities tapno mapagtalinaed ken maipasa kadagiti sumaruno a henerasyon dagiti kultura, tradisyon, ken kinapateg dagiti Indigenous People.
Patien met ni Addog nga iti pakabuklan, well-represented met dagiti Indigeous People kadagiti nagduduma a probinsya iti rehiyon, nupay adda ti maysa a probinsya nga awan pay laeng ti Provincual IPMR na.
Malaksid iti dayta,adda metlaeng dagiti munisipyo ken babbarangay na awan metlaeng iti IPMR na.
Iti baet dayta, impaganetget ni Addog a rumbeng a mapapigsa ti kaadda dagiti pannakabagi dagiti IPs tunggal lokalidad tapno adadda pay a marikna ken mangngeg dagiti boses da iti panangbukel kadagiti programa ken kadagiti aramidenda a desisyon.
Panggep met ti nasao nga ahensya a mapapigsa pay ti partisipasyon dagiti Indigenous People iti panagdur-as ken panangsalimetmet iti kultura iti rehiyon Cordillera. //via Bombo Khey Reparip
