--Ads--
BAGUIO CITY – Bimmaba iti 7.13 percent ti aktibo a kaso ti COVID-19 ditoy Baguio City bayat a ngimmato met iti 91.5 percent dagiti naimbagan.
Sigun ken City Health Officer Dr. Rowena Galpo, bimmaba ti average daily cases ditoy syudad manipod iti 36 a kaso tunggal aldaw idi October ket bimmaba daytoy iti 25 tunggal aldaw ita a November.
Malaksid iti dayta, maysa laeng ti death case a nailista iti las-ud ti maysa a lawas.
Maibasar met iti 7-day moving average (MA) monitoring, naobserbaran a nakailista laeng iti 10 a kaso tunggal aldaw iti las-ud ti maysa a lawas ditoy siudad.
Gapu iti dayta, kinuna ni Galpo a dakkel iti nagdur-asan ti kaso ti COVID-19 ditoy syudad ti Baguio manipod kadagiti napalabas a lawas.
