Rumbeng a maisayangkat iti aktual a “prosecution” ti rekomendasion ti House of Representatives a panangipilada ti reklamo mainaig iti pammapatay iti war on drugs ti naglabas nga administrasion.
Daytoy ti kinuna dagiti abogado a mangibagi iti pamilia ti sumagmamano a biktima ti war on drugs ti naglabas nga administrasion.
Iti statement, kinuna ti National Union of Peoples’ Lawyers and Rise Up for Life and for Rights a ti rekomendasion ti kriminal a kaso kontra kenni sigud a President Rodrigo Duterte, da Senador Ronald “Bato” dela Rosa ken Christopher “Bong” Go, ken dagiti sumagmamano nga indbidual mangpasingked iti pammatida nu siasino ti responsable kadagiti pammapatay iti napalabas nga administrasion.
Kinarit pay ti nasao nga organisasion ti Department of Justice nga agtignay iti rekomendasion ti nasao a komite ken agtrabaho a mangsapul iti ebidensia iti naipatungpal a panagdinggeg ti Quad Committee,ken dadduma pay a rekord manipod iti nagduduma nga ahensia.
Kinuna ti nasao nga organisasion a suportaranda ti kaso kontra kadagiti kontra kadagiti direkta a nangaramid iti mapapati a pammapatay kasta met kadagiti superior ken dagiti responable iti pammapatay.
Idi laeng kalman, kinondenar ti Partido Demokratiko Pilipino (PDP) ti House Quad Committee ken ti naduktalanda iti panagdinggeg a naisayangkat iti naglabas nga aldaw.
Sigun iti Partido Demokratiko Pilipino (PDP) nga idadauloan ti sigud a Presidente Dutere, ti rekomendasion ti nasao a komite ket nalawag a “politically motivated” ken awan ti ligal a pangibasaranda.
Patien ti Partido Demokratiko Pilipino (PDP) a dagiti testimonia a naurnong iti panagdinggeg ti Quad Committee ket nagun-od babaen ti panangpilit gapu iti pangta a ma-cite in contempt dagitoyken maibalud iti Kamara.
Nakalanad iti statement ti political party a ti panagdinggeg ti Quad Committee ket paset ti naannad a plano, nasayaat ti pannakapondona, ngem saan a nasayaat ti pannakaipatungpalna a “demolition job” babaen kadagiti kameng ti House of Representatives kontra kadagiti Duterte.
