Maguygoyugoy ti publiko a makikaykaysa iti trek for a cause nga “Akyat para sa West Philippine Sea: Batad Trek” idiay Barangay Batad, Banaue, Ifugao inton Mayor 31, 2026, kas paset iti maika-4 nga Iwang Ad Batad wenno Tinawon Rice Harvest Festival.
Iti pannakiuman iti Bombo Radyo kenni Barangay Captain Romeo Heppog, manamnama a makipaset dagiti kameng iti Philippine Coast Guard manipod iti West Philippine Sea, a mapatta-patta a dumanon iti 150 a personnel.
Sigun kenni Heppog, adda ti registration fee a ₱1,000 nga inclusive iti Iwang T-shirt, danum, community lunch, ken donasion para iti panangisimpa kadagiti rice terraces a naapektaran iti panagregaay iti daga.
Panggep iti aktibidad a mapangato ti pannakaamo iti publiko iti isyu iti West Philippine Sea ken ipakita ti pannakikaykaysa iti gobierno seknan iti daytoy.
Kagiddan iti daytoy, maisayangkat metlaeng ti kangrunaan nga aktibidad a Grand Harvest iti Rice Terraces,kasta mettten ti dadduma pay nga ethnic activity, karaman ti panangiserbi iti rice wine ken panangipakita iti tradisional a proseso iti panangaramid iti daytoy.
Manamnama nga agbalin a keynote speaker ni Ifugao Governor Jerry Dalipog, kadua dagiti opisial manipod iti sektor iti turismo.
Innayonna pay a manamnama ti panagsarungkar dagiti lokal ken ganggannaet a turista, gaputa ngumatngato ti bilang dagiti sumarsarungkar idiay Batad, maysa kadagiti kangrunaan a tourist destination iti Pilipinas.
Sigun pay kenni Heppog, napateg ti aktibidad nangruna ta dakkel ti nadadael kadagiti rice terraces gapu iti bagyo nga Uwan, ken ti maurnong a pondo ket mailatang iti rehabilitasion wenno panangpapintas kadagitoy.
Impaganetgetna a dakkel ti tulong iti publiko iti panangisubli ken panangpapintas iti maysa kadagiti UNESCO World Heritage Sites iti pagilian a Pilipinas.
