Mangnamnama dagiti mannursuro nangnangruna ditoy rehiyon Cordillera a tungpalen ni President Ferdinand Marcos, Jr. dagiti inkari na idi kalman kabayatan iti panagbitlana para iti 2026 National Teachers’ Day Celebration idiay Smart Araneta Coliseum in Cubao, Quezon City nga addaan iti tema a ‘Teacher, Ikaw Naman.”
Iti pannakiuman ti Bombo Radyo kenni Joel Aquino Capulong, mangidadaulo iti Alliance of Concerned Teachers – Cordillera (ACT-Cordillera) a maysa metlaeng kadagiti dimmar-ay iti nasao a selebrasyon, imbinglayna nga agarup 10, 000 a mannursuro ti dimmar-ay iti nasao a selebrasyon.
Imbinglayna a nagserbi kas guest speaker ni President Ferdinand Marcos, Jr. no sadino impettengna ti kinapateg dagiti mannursuro iti panangbukel kadagiti ubbing ken agtutubo.
Nupay kasta, impeksa ni Capulong ti pannakadismayana gapu ta kagidan ti insawang ti presidente seknan iti panangipangpangruna iti pagrebbengan dagiti mannursuro ti pannaka-harass dagiti kakaduada a mannursuro kabayatan iti maysa a rally.
Iti baet dayta, imbinglay ni Capulong a kangrunaan nga inkari ni PBBM kabayatan iti speech na ket ti panangnayun iti budget ken allowance para kadagiti mannursuro kasta metten ti pananghire ti kanayunan a guidance counselors kadagiti pagadalan.
Sigun kenni Capulong, mangnamnama unay dagitoy a tungpalen ti presidente amin dagiti insawangna iti speech na. Innayon ni Capulong a babaen iti daytoy, maiparangaranga a pudno ti panangisakitda kadagiti amin a mannursuro iti pagilian a Pilipinas. //kcs//
