Nalaos ti panagbabawi ti maysa nga ama idiay Singapore kalpasan a pimmusay ti anakna gapu iti wagas ti panangdisiplinana.
Pilit ngamin a pinakanna iti maysa a pidaso ti sili ti 4-anyos nga anakna gapu ta nag-ulbod daytoy.
Naangot ti ama a nagtakki gayam ti anakna ngem saanna nga imbaga.
Isursuro ngamin ti ama iti anakna a nu agtakki daytoy ket ibagana ngem idi dinamagna ti anakna ket nag-ulbod.
Gapu iti daytoy, nagdesisyon ti ama a disiplinaan ti anakna.
Nangala daytoy ti sili iti refrigerator ken pilit nga inpakanna iti anakna.
Nupay kasta, naipullat ti sili iti air passage ti ubing rason a napukawan ti puot ken pimmusay.
Sinentensiyaan met ti korte ti ama ti biktima iti walo a bulan a pannakaibalud agingga iti lima a tawen gapu iti naranggas a wagas a panangdisiplinana.
Saan metten a nainaganan ti ama ken ti anak para iti proteksyon dagitoy nangruna ta adda pay ti tallo nga uubbing a kabsat ti biktima.
Napasamak ti insidente iti mismo a balay ti agama idi Agosto 2, 2022 ngem idi laeng Marso iti agdama a tawen a nasentensiyaan ti ama.
