Ginuyugoy ti Philippine National Police dagiti pagadalan a makikoordinar kadagiti polis, sakbay nga ipatungpalda ti aktibidad iti ruar ti kampus dagitoy.
Babaen iti daytoy, makatulong dagiti Polis tapno masigurado ti kinatalged dagiti estudiante.
Daytoy ti kinuna ti PNP kalpasan ti shooting incident iti pagadalan sadiay Tacloban City a nakatayan ti tallo nga estudiante ken pannakalmes ti dua nga student-athletes ti Ateneo de Manila University kabayatan ti team-building activity dagitoy idiay Aurora.
Sigun kenni PNP chief Police Gen. Jose Melencio Nartatez Jr., panggep ti nasao nga addang a maaramid ti umno a security assessments, emergency response planning, traffic management, ken koordinasion kadagiti rescue ken medical services.
Innayon ti ahensia nga amin a regional offices ken local police stations ket nabilin a maaddaan ti regular a koordinasion iti Department of Education ken iti Commission on Higher Education.
Immunan nga indagadag dagiti polis kadagiti otoridad ti pagadalan a paingetanda ti mental health ken psychosocial support para kadagiti estudiante.
Kasaruno daytoy dagiti shooting incident, ken stabbing incidents a napasamak iti sumagmamano a pagadalan iti pagilian.
