BAGUIO CITY – Guyguyuguyen ti Benguet Electric Cooperative dagiti amin a member-consumers daytoy tapnu makipasetda iti maangay nga Annual General Membership Assembly (AGMA) iti sumaruno a bulan.
Iti panakiyuman ti Bombo Radyo kenni James Palicdon, Community Relations Officer ti kooperatiba, inton June 2 ket maangay ti AGMA iti Paoad Elementary School sadiay Caponga, Tublay, Benguet.
Kinunana a kangrunaan a rumbeng nga agturong iti nasao a taripnong dagiti member-consumers ti District 10 ken 11 wenno dagiti munisipyo ti Atok, Tublay, Kapangan, Kibungan, Buguias, Bakun ken Mankayan.
Maangay met inton June 9 ti kapada a taripnong iti BSU-Bokod Campus sadiay Ambangeg, Bokod ken kangrunaan a maim-imbitaran dagiti member-consumers ti Southern District ti La Trinidad, Bokod, Kabayan, Tuba, Sablan ken Itogon.
Maudi a maangay ti AGMA inton June 16 iti Baguio City Athletic Bowl.
Sigun pay kenni Palicdon, obligasyon dagiti amin a member-consumers a makipaset iti AGMA gaputa sadiay a maiparang dagiti amin a report ken programa ti kooperatiba.
Innayonna a mabalin nga idanun metten dagiti konsyumer ti pakaseknanda iti kooperatiba, kas kadagiti reklamo ken singasing para iti panakapapintas pay ti serbisyo ti BENECO.
