Imbasura ti International Criminal Court Pre-Trial Chamber I ti kiddaw ti kampo ni sigud a President Rodrigo Duterte a mapalubusanda nga agapila iti nagbalin a pangngeddeng iti kaso a “crimes against humanity” mainaig iti ‘war on drugs’ campaign ti sigud nga administrasyon.
Maibasar iti maika-12 a panid ti desisyon, naibasura ti kiddaw ti depensa babaen kadagiti tallo a judges a da Presiding Judge Iulia Antoanella Motoc, Judge Reine Adélaïde Sophie Alapini-Gansou, ken Judge María del Socorro Flores Liera.
Sigun iti kampo ni Duterte, nalawa unay ti sakup dagiti kaso.
Ngem sigun iti Prosecution, umno ti inlanad ti korte mamaipapan iti sakup dagiti kaso ti sigud a presidente.
Malaksid iti dayta, nailawlawag metlaeng dagiti basaran ti ebidensia a naaramat iti desision.
Sigun pay iti depensa, saan nga umdas ti panangilawlawag ti korte kadagiti naaramat nga ebidensia.
Iti baet dayta, inlawlawag ti Prosecution a sinurot ti Pre-Trial Chamber ti umno a proseso ket saan a kasapulan a saggay-saen nga ilawlawag dagiti ebidensia a basaran ti desision dagitoy.
Maipalagip nga idi Abril 23, pinasingkedan ti ICC ti kaso kontra kenni Duterte mainaig iti mapapati a pammapatay iti sidong ti kampaniana kontra iti illegal a droga.
