BAGUIO CITY – Imbasura ti Court of Appeals ti aplikasyon dagiti mapapati nga illegal settlers sadiay Puguis Communal Forest a matituluan ti daga dagitoy iti nasao a bantay.
Sigun kenni La Trinidad Mayor Romeo Salda, impetteng ti Court of Appeals a saan a dagitoy ti mabalin nga agipaay ti titulo iti nasao a disso nangruna ta ti bantay ket communal forrest.
Kinunana a gapu iti daytoy, kiniddaw ti korte ti panangisumitir ti local a gobyerno ti La Trinidad iti mapa a mangipakita a dagiti abong-abong ni Pedro Isican ket masarakan iti uneg ti communal forest.
Namnamaen ti mayor nga iti kanito a maisumitirda ti makidkiddaw a mapa ket addan ti desisyon nga ipaulog ti Court of Appeals iti kabiitan a panawen.
Naamuan a ti isumitirda a mapa ket ti kaudian a joint survey nga insayangkat ti local a gobyerno ti La Trinidad ken ti Department of Environment and Natural Resources iti deppaar ti lote nga ok-okuparen ni Isican.
