Naituding a maangay intun April 14 wenno 15 iti agdama a tawen ti End-of-School-Year (EOSY) rites bayat a mangrungi ti School Year 2025-2026 intun June 16, 2025.
Iti pannakiuman iti Bombo Radyo kenni Mr. Nino Tibangay, Chief Education Supervisor ti DepEd Baguio, kinunana nga agleppas ti Forth quarter ti Grade 6, Grade 10 ken Grade 12 intun April 7 ken 8.
Kabayatanna, impetteng ti nasao nga opisial a nakasaganan dagiti 67 a public schools iti siudad para iti umadani nga End-of-School-Year (EOSY) rites wenno graduation dagiti estudiante.
Mainaig iti dayta, nabigbigen dagiti venue bayat a maisagsagana dagiti diploma, certificates of completions dagiti estudiante.
Sigun kenni Tibangay, nasayaat a liklikan dagiti pagadalan nga agkiddaw iti kontribusion manipud kadagiti nagannak dagiti estudiante para iti pannakaipatungpal dagiti graduation ceremonies.
Malaksid iti dayta, impettengna a liklikan dagitoy ti nagarbo a selebrasion.
Iti baet dayta, inaklon ti nasao nga opisial nga adda dagiti sumagmamano a nagannak a bolutaryo nga agdonar iti kuarta a maaramat a pangdisenio.
Nupay kasta, impettengna a saan nga awaten daytoy dagiti advisers ken principal, no sadino nasaysayaat a dagiti parents mismo ti mangimanihar kadagiti maurnongda a kontribusion.
Kabayatanna, inyunay-unay ti nasao nga opisial a nainget a maipawil dagiti politiko nga agserbi kas guest speaker kadagiti Graduation ceremonies. //mp4
