Natungpal ni Jessebelle Pagaduan ti panggep daytoy a makaala ti nangatngato pay nga achievement iti karerana iti boksing.
Daytoy ket kalpasan a napanaganan kas baro a champion iti World Boxing Council (WBC) Asia Female Flyweight Division kalpasan nga inabakna ni Pimchanok Thepjanda manipud Thailand idi June 27.
Iti panakiuman ti Bombo Radyo kenkuana, inaklonna nga iti baet ti adu a kapadasan daytoy, kinasapulanna ladta ti agannad gapu ta napartak ti tignay ken nadagsen met ti danug ti nakalabanna.
Iti baet nga ub-ubing ti nakalaban ni Pagaduan, naobserbaranna a nalaing daytoy a dumiskarte nangruna iti panagcounterpunch.
Innayon ni Pagaduan a nagtunos ti patta-pattana iti nagbalin a judgement dagiti maseknan a lumamang daytoy iti tallo agingga uppat a round.
Kalpasan ti panangabak ti boksingera iti nasao a pasalip, impeksana a panunotenna pay a naimbag ti panakipasetna met iti female world boxing tournament.
Dinakamatna met a silulukat daytoy kadagiti oportunidad para iti pagsayaatan ti karerana
Kabaytanna, impetteng ni Pagaduan a masapol a mabalanse ti oras ken masursruro ti agsakripisyo nu sinirrek ti maysa nga indibidwal ti kinaatleta.//Bombo Rob Dominguez
