Inreklamo iti maysa a kameng iti pulisya iti Baguio City ti maysa a lalaki gapu iti panangisawang daytoy iti dakes a pannarita ken saanna a panagtulnog kadagiti persons in authority.
Sigun iti imbestigasyon,maysa a taxi driver ti nagsardeng iti Baguio City Police Office – Police Station 5 tapno agpatulong gapu iti maatap nga arogante a pasahero daytoy.
Kasaruno dayta, kinasarita dagiti kameng iti pulisya ti nasao a pasahero iti kalmado ken naalumanay a wagas, kas iti panagiladawanda.
Nupay kasta,maatap a nagpukkaw ti pasahero ken nangisawang iti dakes a pannarita a nangitunda iti panangpa-ulog dagiti kameng iti pulisya iti daytoy manipod iti taxi a naglugananna.
Intuloy pay latta ti pasahero ti aramidna idi nakastrek daytoyen iti istasyon iti pulisya.
Kalpasan dayta ket nagturong daytoy iti tengnga iti kalsada ken pinuk-pukkawanna dagiti motorista.
Iti laksid iti panangtubngar dagiti kameng iti pulisya iti nasao nga indibidwal, saan latta a nagpaanawa daytoy rason a naireklamo iti kaso nga Unjust Vexation ken Resistance and Disobedience to Person in Authority or to Agents of such person.
Ti naireklamo ket maysa metlaeng a residente iti City of Pines.//Bombo Genzel Depayso
