Naitantan manen ti arraignment ni Vice President Sara Duterte iti tallo a bilang ti grave threats iti mamindua a daras babaen iti Quezon City Regional Trial Court Branch 98.
Immunan a naituding daytoy idi Setyembre 11 ngem naiyakar daytoy ita nga aldaw.
Nupay kasta, inbutaktak ni Paul Lawrence Lim, legal counsel ti bise presidente nga inkonsidera ti korte ti pending a motions for partial reconsideration ad cautelam kasta metten ti petition for certiorari iti Korte Suprema.
Dagiti nasao a kaso ket maipapan iti insawangna a pangta kontra kada President Ferdinand Marcos Jr., First Lady Liza Araneta-Marcos, ken sigud a House Speaker Martin Romualdez.
Maipalagip a naipila dagiti nasao a kaso babaen iti Department of Justice (DOJ) idi laeng Agosto kalpasan a naiyuman kadakuada ti reklamo babaen iti National Bureau of Investigation (NBI) idi Pebrero idi naglabas a tawen seknan iti insawangna a pangta kadagiti nangangato nga opisyal ken indibidual, banag a nainget a pinaglibakan ti bise presidente.
Kabayatanna, personal a nagturong ni VP Sara iti naituding kuma nga arraignment ita nga aldaw idiay Quezon City Regional Trial Court.
Iti ambush interview kenkuana, impeksana ti panagyamanna kadagiti legal team na ken dagiti agtultuloy a mangsupsuporta kenkuana.
