Nangipaulog itay nabiit ti regional trial Court ti Angeles, Pampanga iti arrest warrant kontra kenni Atty. Harry Roques ken sangapulo pay nga indibidual gapu iti mapapati a human trafficking mainaig iti Philippine Offshore Gaming Operator (POGO) hub idiay Pampanga.
Karaman kadagiti naipaayan iti warrant of arrest ni Cassandra Ong a mapapati a representative ti POGO hub Lucky South 99 idiay Porac, Pampanga.
Maibasar iti dokumento a pinirmaan ni RTC Presiding Judge Rene Reyes idi Mayo 8, 2025, nasarakan ti korte ti probable cause kontra kada Roque, Ong, ken siam a dadduma pay gapu iti non-bailable violations iti sidung ti Anti-Trafficking in Persons Act of 2003.
Impila ti Department of Justice ti qualified human trafficking ken regular human trafficking cases kontra ken ni Roque gapu iti maipagarup a pannakipasetna, saan laeng a kas abogado ti Whirlwind Corporation a nangpaabang iti lote para iti Lucky South 99, no di ket kas pannakabagi ti POGO.
Maipalagip a nagserbi ni Roque iti dua a stints kas pannakangiwat ti Palasio iti termino ni sigud a president Rodrigo Duterte.
Pimmanaw iti Pilipinas idi Setiembre 2024 kalpasan a na-cite in contempt gapu iti panagkedkedna a tumabuno kadagiti House hearings.
Idi Disiembre idi napan a tawen, nangipila iti counter-affidavit daytoy manipud idiay United Arab Emirates ken inlibakna nga abogado daytoy ti Lucky South 99.
Malaksid iti dayta, nagkiddaw iti asylum idiay Netherlands.
Kinuna ti DOJ idi Abril iti agdama a tawen a lapdanna ti asylum application ni Roque iti kanito a maipaulog ti arrest warrant kontra kenkuana.
Sigun met kenni DOJ Undersecretary Nicholas Felix Ty, iti kanito a mairuar ti arrest warrant, kiddawen ti gobierno ti Pilipinas nga ikabil ni Roque iti red notice ti International Criminal Police Organization, ti global police group a nangipaay iti International Criminal Court warrant kenni sigud a President Rodrigo Duterte.
