Nakaawat ti report ni sigud a President Rodrigo Duterte a mapapati nga addaan ti arrest warrant a naipaulog kontra kenkuana manipod iti International Criminal Court (ICC), ken kinunana nga inaramidna laeng ti kasapulan tapno agtalinaed a natalged ti Pilipinas bayat ti administrasionna.
Daytoy ket bayat ti panagbitlana idiay Wan Chai, Hong Kong idi kalman.
Agtaltalinaed ti pammatina a ti addang nga inaramidna kas presidente ket addaan panggep a maipasigurado ti linak ken kappia iti Pilipinas.
Ti International Criminal Court (ICC) ket mangim-imbestigar kenni Duterte ken dadduma pay nga opisial ti administrasionna para iti maatap a “crimes against humanity” a mainaig iti rinibribu a pimmusay iti police anti-drug operations.
Maibasar iti rekord ti gobierno, agarup 6,000 a drug suspect ti napapatay iti police operations bayat ti war on drugs ni Duterte.
Nupay kasta, mapatta-patta a pakabuklan a 30,000 ti napapatay, sigun iti human rights groups.
Ni Duterte ket nakipaset idi kalman ti thanksgiving event idiay Hongkong dagiti overseas Filipino workers (OFWs).
Pinaglibakan met ni sigud a presidential chief legal counsel Salvador Panelo dagiti alegasion a padpadasen ti sigud a Presidente ti aglibas bayat ti kaaddana iti ruar ti pagilian.
