Impaulog ti Iligan City Regional Trial Court Branch 1 ti arrest warrants kontra kadagiti 12 nga indibidual gapu iti pannaka-ambush ni Shariff Aguak Mayor Datu Akmad “Mitra” Ampatuan Sr. sadiay Barangay Poblacion, Shariff Aguak, Maguindanao del Sur idi Enero 25.
Karaman kadagiti 12 a naipaayan iti arrest warrant ni Maguindanao del Sur Mayor Datu Andal “Xyril” Ampatuan V ken 11 pay nga indibidual.
Sumangsango dagiti akusado iti four counts ti frustrated murder ken nagtutuon a panaglabsing iti Republic Act 11479, wenno ti Anti-Terrorism Act of 2020, pakairamanan ti Section 4 (Terrorism), Section 6 (Planning, Training, Preparing, and Facilitating the Commission of Terrorism), ken Section 7 (Conspiracy to Commit Terrorism).
Maipalagip nga idi Enero 25, i-nambush dagiti armado a lallaki ti lugan ni Shariff Aguak Mayor Ampatuan babaen iti rocket-propelled grenade wenno RPG.
Saan a nadangran ti Mayor ngem nasugatan ti dua kadagiti security escort daytoy.
