Naduktalan ti maysa a korte idiay France a nagbasol ni Dominique Pelicot gapu iti maulit-ulit a panangdroga ken panangramesna iti asawana iti dandani sangapulo a tawen, ken panangawisna iti limapulo a ganggannaet a mangrames iti awan puot a bagi ti asawana iti pagtaenganda.
Saan a dagus a nangipaulog ti maysa a panel dagiti hues iti sentensia kontra iti nasao a lalaki, ngem kiniddaw dagiti piskal ti pannakaibalud daytoy iti duapulo a tawen, iti kaso a nangbutbuteng iti lubong ken namagbalin iti biktima a ni Gisele Pelicot a simbolo ti tured ken kinaandur.
Kidddaw pay dagiti piskal a maibalud iti nagbaetan ti uppat ken sangapulo ket walo a tawen dagiti lima pulo a naidarum, a dandani amin ket naakusaran a nangrames iti nacomatose a ni Pelicot.
Dagiti sentensia ket masapul a maipaay ti korte iti makin-abagatan a Francia inton Huebes.
Ti suspek a ni Dominique Pelicot ket agtawen ti pito pulo ket dua, ket nagbasol iti kaso bayat ti tallo a bulan a “trial” ken nagdispensar daytoy iti pamiliana.
Adu kadagiti padana a naidarum, a naam-ammona iti online, ti nangilibak iti panangrames, a kunada nga impagarupda a makipaspasetda iti consensual sex game nga inorganisar ti agassawa ken inrasonda a saan a panangrames ti inaramidda no inaprobaran ti asawa a lalaki.
Ti met biktima a ni Gisele Pelicot nga agtawen ti pitopulo ket dua ket inwaksina ti kalinteganna a saan a mangipakaammmo iti naganna bayat ti “trial” ken kiniddawna a makita koma iti korte dagiti nakabutbuteng a video ti serial abuse, nga inrekord ti sigud nga asawana, a namnamaenna a makatulong daytoy kadagiti dadduma a babbai nga agsao.
Ti trial ket nangtignay kadagiti raliyesta nga agprotesta iti aglawlaw ti France a mangsuporta kenni Gisele ken impaganetget dagitoy a rumbeng a maadal manen ti linteg ti pangrames idiay France.
