Inwaragawag iti Anti-Money Laundering Council idi laeng kalman a nangipaiyulog daytoyen iti freeze order kadagiti bank accounts wenno assets dagiti indibidwal ken korporasyon nga adda ti pakainaiganna kadagiti kontrobersyal a flood control projects.
Sigun kenni AMLC Executive Director Atty. Matthew David, saklawen ti nasao a freeze order ti 135 bank accounts ken 27 insurance policies dagiti indibidwal ken korporasyon.
Daytoy ket kalpasan nga inaprubaran iti Court of Appeals (CA) kasaruno metlaeng ti kiddaw iti Department of Public Works and Highways (DPWH) idi September 12.
Sigun kenni DPWH Secretary Vince Dizon, ti nagnagan dagiti 26 a karaman iti freeze order ket isu metlaeng dagiti sumangsango iti kaso a graft iti Office of the Ombudsman.
Daduma kadagitoy ket da Henry Alcantara,Brice Ericson Hernandez,Jaypee Mendoza,John Michael Ramos, ken ni Ernesto Galang.
Kasta metten dagiti opisyales iti DPWH a da Lorenzo Pagtalunan, Norberto Santos, Jaime Hernandez, Floralyn Simbulan, Juanito Mendoza, Roberto Roque, Benedict Matawaran, Christina Mae Pineda, Paul Jayson Duya, Merg Jason Laus, Lemuel Ephraim Roque, Arjay Domasig, John Carlo Rivera, John Benex Francisco, ken Jolo Mari Tayao.
Karaman metlaeng iti listaan dagiti kontraktor a kas kada Ma. Roma Angeline Rimando, Cezarah “Sarah” Rowena Discaya, Pacifico “Curlee” Discaya II, Mark Allan Arevalo,Sally Santos, ken Robert Imperio.
Nupay kasta, saanen a naipakaammo ti mapatta-patta a gatad kadagiti bank accounts a ma-freeze.
