BAGUIO CITY – Pinadayawan ti Benguet LGU dagiti atleta, coaches, sports icons ken supporters dagitoy iti kaunaan a Benguet CARES (Cordillera Athletic Recognition for Excellence in Sports) Awards Program.
Sigun kenni Mr. Dean Mark Monang, Sports Development Officer ti Benguet, panggep ti nasao a programa a maipaayan iti pammabigbig dagiti atleta ken indibidual a nakaiyawid ken nakaipaay ti pammadayaw iti probinsya babaen iti panagay-ayam dagitoy iti national ken international sports competitions.
Gapu iti dayta, tarigagayda ita a pagbalinen kas annual sports awards tapno agserbi nga inspirasyon ken motibasyon kadagiti atleta.
Karaman a naipaayan iti cititations dagiti atleta manipud iti bodybuilding, boxing, dance sports, taekwondo, jui jitsu, kickboxing, football, athletics, muaythai, triathlon, sambo, wrestling, wushu ken dadduma pay.
Nabigbig met dagiti indibidual a pimmusayen a nakaipaay iti dakkel a kontribusyon iti panagdur-as ti sports babaen iti Posthumous Awards.
Highlight iti nasao nge event ti panangited iti awards kadagiti naisangsangayan nga individual gapu iti impact dagitoy iti sports.
Athlete of the year ni One Strawweight champion Joshua Pacio, Hall of Fame Award ni sigud a boxing champion Rey Tam, Coach of the Year ni Team Lakay founder Mark Sangiao, Lifetime Achievement Award ni marathoner Cristabel Martes, Sportsman of the year ni Dr. Frael Aquino, Executive of the Year ni Manuel Bitog ken Young Sports Achiever of the year da Kickboxing national fighter Islay Bomogao ken Crisamuel Delfin.
