Agtultuloy a nakaalerto dagiti maseknan nga opisyales ti munisipyo ti Atok, Benguet kagiddan ti mapaspasaran nga epekto ti habagat.
Iti pannakaiuman ti Bombo Radyo kenni Atok Mayor Franklin Smith, kinunana nga agtultuloy latta nga imonmonitorda ti aglawlaw ti munisipyo dagitoy agsipud ta adda dagiti sumagmamano a panagreggaay ti daga ken panagtennag ti batbato sadiay.
Sigun kenkuana, nakapasar dagitoy iti panagreggaay ti daga ken batbato rason a naiparekep iti sumagmamano nga oras dagiti naapektaran a kalsada.
Nupay kasta, nagyaman daytoy kadagiti maseknan nga opisina babaen iti pannakitinnulongda rason a dagus a nadalusan metlaeng dagitoy.
Nagyaman metlaeng daytoy kadagiti umili iti pannakitinnulongda iti panagdalus kadagiti minor landslides iti masakupan dagitoy a lugar.
Kinunana nga adda latta dagiti soil erosion a mapaspasaran ngem manageable met dagitoy.
Nagyaman pay daytoy agsipud ta awan ti naapektaran nga umili iti munisipyo ti Atok.
