Nakasaganan dagiti automated counting machine a mausar para iti roadshow wenno panakatesting dagitoy inton lunes, Desyembre a dos mangrugi iti oras ti alas nuebe.
Iti exclusive interview ti Bombo Radyo kenni Atty. Julius Torres, Regional Director ti Commission on Elections-Cordillera, kinuna nga adda ti naipaay a saggaysa nga automated counting machine kadagiti municipiyo ken siyudad iti intero a Pilipinas tapno mapadas ken maipakita kadagiti umili ken kadagiti ti electoral boards nu kasanu a maaramat dagitoy.
Sigun kenni Atty. Torres ti nasao a makina ket mas napinpintas ngem kadagiti napalpalabas a makina gapu ta adaan daytoy iti monitor wenno display nga agarup 14 inches, nu sadino ket mas maimatangan dagiti icons wenno resulta iti botos.
Kinunana pay nga adda iti maisayangkat a mock election idiay munisipiyo iti Sagada ken Bontoc ngem awan pay ti umno nga aldaw a naituding para iti daytoy.
Daytoy ket tapno matesting iti transmission no agbalin ti internet access a kasapulan para iti transmission dagiti botos.
Awan met ti guidelines tapno agbalin kas maysa nga electoral boards ti maysa a mannursuro wenno indibidual basta situtulok dagitoy nga agserbi, physically fit ken addaan iti pannakaammo a mang-operate iti computer.
Impeksa pay ditoy ni Torres nga awan met ti naipadpadamag a violent election incident iti rehion ngem mapalpalagipam latta dagiti ag-ngayngayangay a respetuen kuma dagitoy dagiti kalabanda.
Mainaig iti dayta, na-activate metten dagiti law enforcement para iti peace and order ita a kampanya ken umadanin nga election.
Kabayatanna, adda metten ti naideklara a nuisance candidates iti rehion pakairamanan ti agngayngayangay iti kina-kongresista.//Bombo Noveh Organo
