BAGUIO CITY – Natiliw ti maysa a babai iti insayangkat dagiti otoridad nga entrapment operation iti maysa a panganan sadiay Km. 5, La Trinidad, Benguet itay laeng nabiit.
Nabigbig daytoy a ni Lorna Banos Satol, 39-anyos ken residente ti Bangao, Buguias, Benguet.
Maibasar iti report, naisayangkat ti entrapment operation kalpasan a nagreklamo kadagiti otoridad ti dua a biktima ti suspek.
Iti reklamo dagiti biktima, inaramat ti suspek ti facebook messenger account ti managan Aljurina Colaling tapnu agkolektar ken agbulod ti kwarta manipud kadagiti facebook friends ni Colaling ken nakaurnong ti suspek iti pakabuklan a P230,000.
Kabayatan ti operasyon, nakumpiskar iti ikot ni Satol ti naaramat a boodle money ken maysa a cellphone a naaramat iti transaksion.
Sumangsangon ti suspek iti kaso nga estafa ken iti kaso a panaglabsing iti Cybercrime Prevention Act of 2012.
