BAGUIO CITY–Nakasagana dagiti amin a barangay ditoy Baguio City para iti umadani a pannakaiwaras dagiti bakuna kontra COVID19 ditoy siudad.
Iti interview ti Bombo Radyo kenni Committee on Barangay Affairs ken Councilor Micheal Lawana, kinunana a manarimaan ti data gathering dagitoy para iti pannakairekord dagiti kasapulan a maipangruna a maipaayan ti bakuna pakairamanan dagiti natataengan, frontliners ken dadduma pay.
Dinakamatna nga adda dagiti vaccinators a maiwaras para kadagiti tunggal barangay ken agtultuloy ti panangipatungpalda iti information education campaign (IEC) tapnu ad-adda a maguyugoy dagiti umili nga agpabakuna.
Imbinglayna pay a nakasagana latta dagitoy iti aniaman a pammilin a maawatda manipod iti lokal a gobierno ti siudad.
Kagiddan iti daytoy, kinunana a positibo ti resulta ken maaw-awatda a reaksyon manipod kadagiti umili seknan iti panagpabakuna dagitoy kontra iti COVID19.
